（པར་ངོས་དང་པོར་མཐུད）ཕྱོགས་བསྡུས་ཁྲལ་སྲུང་ཁུལ་ཐོག་མ་དེ་རེད། ཡན་ཅིན་ཧའེ་སྔ་རྗེས་སུ་རྒྱལ་སྒྲོལ་དྲ་ཐོག་ཚོང་ཁང་འགྲེམས་སྟོན་ལྟེ་གནས་དང་། ཙོན་ཡོན་ཚན་རྩལ་ཚད་ཡོད་ཀུང་སི། ཞུས་ཏ་ཐུང་ཚོང་དོན་ཚད་ཡོད་ཀུང་སི་བཅས་སུ་ཕེབས་ནས་ཕྱོགས་བསྡུས་ཁྲལ་སྲུང་ཁུལ་གྱི་གཉེར་སྐྱོང་དོ་དམ་དང་། ཁེ་ལས་ཀྱི་ཐོན་སྐྱེད་གཉེར་སྐྱོང་། ཕྱི་ཕྱོགས་ཚོང་དོན་ཕྱིར་གཏོང་ནང་འདྲེན་བཅས་ཀྱི་གནས་ཚུལ་རྣམས་ཡུལ་དངོས་སུ་མཁྱེན་རྟོགས་གནང་ཞིང་། ཁོང་གིས་ཕྱོགས་བསྡུས་ཁྲལ་སྲུང་ཁུལ་ནི་རང་ལྗོངས་ཀྱི་ཆུ་ཚད་མཐོ་བའི་ཕྱི་ཕྱོགས་སྒོ་དབྱེའི་གཞི་རྟེན་གལ་ཆེན་ཞིག་རེད། ཕྱོགས་བསྡུས་ཁྲལ་སྲུང་ཁུལ་གྱི་བྱེད་ནུས་ཀྱི་ལེགས་ཆ་དང་སྲིད་ཇུས་ཀྱི་ལེགས་ཆ་གང་ལེགས་བཏོན་ནས་ཚོང་གཉེར་གྱི་ཁོར་ཡུག་མུ་མཐུད་ལེགས་སུ་གཏོང་བ་དང་། དོ་དམ་གྱི་ཞབས་ཞུ་ཞིབ་ཚགས་སུ་གཏོང་བ། ཁེ་ལས་ལ་དཀའ་ངལ་དངོས་སེལ་རོགས་བཅས་བྱས་ཏེ་རྒྱལ་སྒྲོལ་དྲ་ཐོག་ཚོང་དོན་སོགས་ལས་རྣམ་གསར་པ་སྐྱེད་སྲིང་ཧུར་ཐག་བྱེད་པ། བོད་ཀྱི་དགེ་མཚན་ལྡན་པའི་ཐོན་རྫས་ཕྱིར་གཏོང་ལ་རྒྱབ་སྐྱོར་བྱེད་པ། ཕྱི་ཕྱོགས་ཚོང་དོན་ཕྱིར་གཏོང་ནང་འདྲེན་བྱེད་མང་དུ་འགྲོ་རྒྱུར་སྐུལ་འདེད་གཏོང་བ་བཅས་བྱས་ཏེ་ཆུ་ཚད་མཐོ་བའི་སྒོ་དབྱེར་བརྟེན་ནས་སྤུས་ཚད་མཐོན་པོའི་སྒོ་ནས་འཕེལ་རྒྱས་འགྲོ་རྒྱུར་སྐུལ་འདེད་གཏོང་དགོས་ཞེས་གསུངས་པ་རེད།
ལྷ་ས་གྲོང་ཁྱེར་བྱང་སྐོར་ལམ་ནུབ་སྲིང་ལམ་ཐིག་གི་རྣམ་གྲངས་ལས་སྒྲུབ་ཁུལ་དུ། ཡན་ཅིན་ཧའེ་ཡིས་རྣམ་གྲངས་འཆར་འགོད་ཀྱི་ཇུས་འགོད་དཔེ་རིས་ལ་ཞིབ་པར་གཟིགས་པ་མ་ཟད། རྣམ་གྲངས་འཆར་འགོད་འཛུགས་སྐྲུན་གྱི་གནས་ཚུལ་སོགས་ལ་གསན་ཞིང་། ཁོང་གིས་ལྟེ་བའི་གྲོང་ཁྱེར་གྱི་གནས་རིམ་དང་པོའི་ཚད་གཞི་མཐོ་རུ་གཏོང་བར་གཞི་ཚུགས་ནས་འགྲིམ་འགྲུལ་ཕན་ཚུན་འབྲེལ་མཐུད་ལ་ཤུགས་སྣོན་བརྒྱབ་སྟེ་གྲོང་ཁྱེར་གྱི་འགྲིམ་འགྲུལ་གྱི་གནོན་ཤུགས་ཆུང་དུ་གཏོང་བ་དང་། གྲོང་ཁྱེར་གྱི་བྱེད་ནུས་དང་སྤུས་ཚད་མཐོ་རུ་གཏོང་བ། མི་དམངས་མང་ཚོགས་འགྲོ་སྐྱོད་བདེ་བའི་སྐྱིད་སྣང་དང་བློ་ཡིད་ཚིམ་ཚད་རྒྱུན་ཆད་མེད་པར་ཆེ་རུ་གཏོང་དགོས་ཞེས་ནན་གསུངས་གནང་བ་རེད།
（དཔལ་སྐྱབས་རྒྱལ་གྱིས་སྒྱུར་ཞུས་བྱས）
藏公网安备 54010202000024号