བློ་མཐུན་རྣམ་པ་དང་། གྲོགས་པོ་རྣམ་པ།

ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་75འཁོར་བར་རྟེན་འབྲེལ་ཞུ་བའི་སྐབས་སུ། ང་ཚོས་འདི་གར་མཛད་སྒོ་གཟབ་རྒྱས་འཚོགས་ཏེ་རྒྱལ་ཁབ་ཀྱི་མཚན་སྙན་མཐོ་ཤོས་དེ་རྒྱལ་ཁབ་འཛུགས་སྐྲུན་དང་འཕེལ་རྒྱས་ལ་མཛད་རྗེས་གཟེངས་སུ་ཐོན་པ་བཞག་པའི་རྨད་དུ་བྱུང་བའི་མི་སྣ་དང་།ཀྲུང་གོ་དང་ཕྱི་རྒྱལ་གྱི་སྤེལ་རེས་མཉམ་ལས་ལ་སྐུལ་འདེད་གཏོང་ཆེད་མཛད་རྗེས་གཟེངས་སུ་ཐོན་པ་བཞག་པའི་རྒྱལ་སྤྱིའི་གྲོགས་པོར་སྤྲོད་རྒྱུ་ཡིན། ཐོག་མར་ངས་ཏང་ཀྲུང་དབྱང་དང་། རྒྱལ་ཡོངས་མི་དམངས་འཐུས་ཚོགས། རྒྱལ་སྲིད་སྤྱི་ཁྱབ་ཁང་། ཀྲུང་དབྱང་དམག་ཨུད་བཅས་ཀྱི་ཚབ་ཞུས་ཏེ་སྤྱི་མཐུན་རྒྱལ་ཁབ་ཀྱི་བྱས་རྗེས་གཟེངས་རྟགས་དང་རྒྱལ་ཁབ་ཀྱི་གཟི་བརྗིད་མཚན་སྙན་ཐོབ་པའི་དཔའ་བོ་དཔེ་བཟང་བ་དང་། མཛའ་གྲོགས་བྱས་རྗེས་གཟེངས་རྟགས་ཐོབ་པའི་རྒྱལ་སྤྱིའི་གྲོགས་པོ་རྣམས་ལ་སྤྲོ་སེམས་འཁོལ་བའི་ངང་ནས་རྟེན་འབྲེལ་དང་གུས་འདུད་བླ་ན་མེད་པ་ཞུ་རྒྱུ་ཡིན།

ལོ་ངོ་75ཡི་རིང་། ཀྲུང་གོ་གུང་ཁྲན་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་སྣེ་ཁྲིད་མཛད་དེ་དཔལ་འབྱོར་གོང་འཕེལ་མྱུར་པོ་དང་སྤྱི་ཚོགས་ཡུན་རིང་བརྟན་ལྷིང་གི་ངོ་མཚར་ཆེན་པོ་གཉིས་བཏོད་པ་དང་། རླབས་ཆེན་མེས་རྒྱལ་ལ་གནམ་ས་བླ་འོག་ལྟ་བུའི་འགྱུར་ལྡོག་བྱུང་བ། ཀྲུང་ཧྭ་མི་རིགས་འདི་ཉིད་རླབས་ཆེན་བསྐྱར་དར་གྱི་ལྡོག་ཐབས་མེད་པའི་ལོ་རྒྱུས་ཀྱི་འཕེལ་རིམ་དུ་སླེབས་ཡོད། ཟིལ་རླབས་དགུང་འཕྱུར་འདྲ་བའི་གོང་འཕེལ་གྱི་ལོ་རྒྱུས་ལམ་བུའི་ཐོག་འཐབ་ཕྱོགས་ཁག་ནས་དཔའ་བོ་དཔེ་བཟང་ཁག་དང་ཁག་བྱས་ནས་ཐོན་ཡོད། དེ་རིང་གཟེངས་བསྟོད་ཐོབ་པའི་བློ་མཐུན་ནི་ཁོང་ཚོའི་ཁྲོད་ཀྱི་ཕུལ་བྱུང་འཐུས་ཚབ་རེད། ཁོང་ཚོའི་སྔོན་ཐོན་བྱས་རྗེས་དང་མངོན་གསལ་དོད་པའི་ལེགས་སྐྱེས་དེ་དག་སྤྱི་མཐུན་རྒྱལ་ཁབ་ཀྱི་ལོ་རྒྱུས་དེབ་ཐེར་ཐོག་ནམ་ཡང་འཁོད་རྒྱུ་དང་། ཁོང་ཚོའི་བློ་དཀར་སེམས་དཀར་དང་། སྙིང་རུས་ཆེ་བ། བབ་ཆགས་པ་བཅས་ཀྱི་ཕུལ་བྱུང་གི་གཤིས་རྒྱུད་ལ་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་སློབ་སྦྱོང་བྱེད་འོས་པ་ཞིག་ཡོད།

མིག་སྔར། རང་རྒྱལ་འདི་ཉིད་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཁྱོན་ཡོངས་ནས་སྐུལ་འདེད་གཏོང་བའི་འགག་རྩའི་དུས་སྐབས་སུ་སླེབས་ཡོད་པས་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་དཔའ་བོ་དཔེ་བཟང་བ་མིག་དཔེར་བཟུང་སྟེ་མཐུན་སྒྲིལ་འབད་འཐབ་དང་འབད་འབུངས་མདུན་སྐྱོད་ཀྱིས་རྒྱལ་ཁབ་སྟོབས་ཆེན་གྱི་བྱ་གཞག་ཐུན་མོང་ཐོག་སྒྲུབ་པའི་སྟོབས་ཤུགས་ཆེན་པོ་གཅིག་ཏུ་བསྒྲིལ་དགོས།

རྒྱལ་ཁབ་སྟོབས་ཆེར་གཏོང་བའི་ཕུགས་འདུན་སེམས་སུ་བརྟན་པོར་འཆང་དགོས། རྒྱལ་ཁབ་སྟོབས་འབྱོར་ལྡན་པ་དང་མི་དམངས་བདེ་སྐྱིད་ལྡན་པར་འགྱུར་རྒྱུའི་རེ་སྒུག་བྱས་ཏེ་བློ་སེམས་དཀར་བའི་སྒོ་ནས་རྒྱལ་གཅེས་དང་རྒྱལ་ཁབ་ལ་དྲིན་གཟོ་བའི་དམ་བཅའ་འཇོག་པ་དང་། རང་ཉིད་ཆུང་ངུ་དེ་རྒྱལ་ཁབ་ཆེན་པོའི་ནང་དུ་འདྲེས་པར་བྱེད་ཅིང་། རྒྱལ་ཁབ་ཀྱི་ཆེད་དུ་འགན་འཁྲི་སྒྲུབ་པ་དང་མི་དམངས་ལ་ཞབས་འདེགས་ཞུ་བའི་ཁྲོད་དུ་སྒེར་གྱི་རིན་ཐང་མངོན་འགྱུར་དང་མི་ཚེའི་གཟི་མདངས་མངོན་པར་བྱེད་དགོས།

རྒྱལ་ཁབ་སྟོབས་ཆེར་གཏོང་བའི་རྩལ་ནུས་ཞུན་བརྡར་བྱེད་དགོས། དུས་རབས་གོང་འཕེལ་གྱི་བླང་བྱ་གསར་པ་དང་བསྟུན་པ། ཤེས་བྱ་གསར་པར་སློབ་སྦྱོང་དང་རྩལ་ནུས་གསར་པ་ཁོང་དུ་ཆུད་པ། འཇོན་ཐང་ངོ་མ་སྦྱོང་བ་བཅས་བྱས་ནས་བྱ་བ་གང་ཞིག་སྒྲུབ་ན་དེར་དགའ་ཞེན་དང་། གང་ཞིག་ལ་བརྩོན་ཞིབ་བྱས་ན་དེའི་ཕྱོགས་ལ་མཁས་པར་བྱས་ཏེ་ལས་སྒྲུབ་ལས་གཏོད་ལ་མཁས་པའི་ལས་གནས་འཇོན་ཐང་ཅན་དང་གོམས་བྱང་ཅན་དུ་འགྱུར་བར་འབད་བརྩོན་བྱེད་དགོས།

སྙིང་སྟོབས་ཆེན་པོས་རྒྱལ་ཁབ་སྟོབས་ཆེར་གཏོང་བའི་ཐད་བྱས་རྗེས་འཇོག་དགོས། དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པའི་ལོ་རྒྱུས་ཀྱི་རང་འགུལ་དང་བདག་པོའི་འགན་འཁྲི་འཁུར་སེམས་ཀྱི་ཐོག་ནས་ཡར་རྒྱས་བརྩོན་ལེན་དང་དཀའ་ངལ་ལ་མི་འཛེམ་པར་མདུན་དུ་སྐྱོད་པ། ཕུལ་བྱུང་དོན་གཉེར་དང་ཡག་ཐོག་ཡག་བརྩེགས་ཡོང་བ་བཅས་བྱས་ཏེ་སྤྱིར་བཏང་གི་ལས་གནས་ཐོག་སྤྱིར་བཏང་མིན་པའི་བྱས་རྗེས་གཏོད་པ་དང་། གོང་འཕེལ་གྱི་དཀའ་གནད་སེལ་བ་དང་སྒྱུར་བཅོས་ཀྱི་དཀའ་གནད་སྒྲོལ་བ། སྤྱི་ཚོགས་ཞི་མཐུན་དང་བརྟན་ལྷིང་ལ་སྲུང་སྐྱོང་བྱེད་པ་བཅས་ཀྱི་ཐད་རྒྱུན་ཆད་མེད་པར་བྱས་རྗེས་འཇོག་ཐུབ་པ་བྱེད་དགོས།

རླབས་ཆེན་གྱི་དུས་རབས་སུ་དཔའ་བོར་རེ་སྐུལ་དང་སྐྱེད་སྲིང་བྱེད་བཞིན་ཡོད། དཔའ་བོ་གྲངས་མེད་ཐོན་ན། ཏང་དང་མི་དམངས་ཀྱི་བྱ་གཞག་དར་རྒྱས་གོང་འཕེལ་འགྲོ་བ་ལས་ཉམས་རྒུད་དུ་འགྲོ་མི་སྲིད། རིམ་ཁག་ཏང་ཨུད་དང་སྲིད་གཞུང་གིས་དཔའ་བོ་དཔེ་བཟང་བར་ཐུགས་ཁུར་དང་གཅེས་སྐྱོང་བྱས་ཏེ་སྤྱི་ཚོགས་ཡོངས་ཀྱིས་དཔའ་བོར་བརྩི་བཀུར་དང་། དཔའ་བོར་སློབ་སྦྱོང་། དཔའ་བོ་བརྩོན་ལེན་བཅས་བྱ་རྒྱུར་སྐུལ་འདེད་གཏོང་དགོས། གཟེངས་བསྟོད་ཐོབ་པའི་བློ་མཐུན་ཚོས་མཚན་སྙན་ལ་གཅེས་སྤྲས་དང་ཡང་འབད་བསྐྱར་འབད་བྱས་ནས་གཟི་བརྗིད་སྔར་ལས་ཆེ་བ་བརྩོན་ལེན་བྱ་རྒྱུའི་རེ་བ་ཡོད།

བློ་མཐུན་རྣམ་པ་དང་།གྲོགས་པོ་རྣམ་པ།

ལོ་ངོ་75ཡི་རིང་། འཛམ་གླིང་ཐོག་ཀྲུང་གོ་མི་དམངས་དང་བློ་སེམས་གཅིག་མཐུན་དང་སྐྱིད་སྡུག་མཉམ་མྱོང་བྱེད་མཁན་གྲོགས་པོ་རྙིང་པ་དང་གྲོགས་པོ་བཟང་པོ་མང་པོ་ཡོད། དེ་རིང་མཛའ་བཤེས་གཟེངས་རྟགས་ཐོབ་པའི་མཁྱེན་ལྡན་མ་ཏིའར་མ་ལུའོ་སའེ་ཧྥུའུ་ནི་དེའི་ཁྲོད་ཀྱི་ཕུལ་དུ་བྱུང་བའི་འཐུས་ཚབ་ཅིག་རེད། ཀྲུང་གོའི་མི་དམངས་ཀྱིས་ཀྲུང་གོ་གོང་འཕེལ་གཏོང་བ་དང་། ཀྲུང་གོའི་མི་དམངས་དང་རྒྱལ་ཁབ་ཁག་གི་མི་དམངས་བར་གྱི་མཛའ་མཐུན་ཟབ་ཏུ་གཏོང་ཆེད་བྱས་རྗེས་གཟེངས་སུ་ཐོན་པ་བཞག་པའི་རྒྱལ་སྤྱིའི་གྲོགས་པོ་རྣམས་དུས་ནམ་ཡང་བརྗེད་མི་སྲིད། ཀྲུང་གོའི་མི་དམངས་ཀྱིས་འཛམ་གླིང་རྒྱལ་ཁབ་ཁག་གི་མི་དམངས་དང་མཉམ་དུ་འཛམ་གླིང་གི་ཞི་བདེར་སྲུང་སྐྱོང་དང་། ཐུན་མོང་གོང་འཕེལ་ལ་སྐུལ་འདེད། མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་རྒྱུར་སྐུལ་འདེད། མིའི་རིགས་ཀྱི་དེ་བས་མཛེས་སྡུག་ལྡན་པའི་འབྱུང་འགྱུར་བཏོད་ཡོད།

བློ་མཐུན་རྣམ་པ་དང་། གྲོགས་པོ་རྣམ་པ།

ངོ་མཚར་གྱི་རྣམ་པ་གསར་པ་ང་ཚོས་ཐུན་མོང་ཐོག་གཏོད་དགོས་པ་དང་ལོ་རྒྱུས་གསར་པ་ང་ཚོས་ཐུན་མོང་ཐོག་གཏོད་དགོས། དམིགས་ཚད་གཏན་འཁེལ་དང་། སེམས་ནུས་གཅིག་སྒྲིལ། གསར་འབྱེད་ཡར་བརྩོན་བཅས་བྱས་ཏེ་ཐུན་མོང་ཐོག་མི་དམངས་སྤྱི་མཐུན་རྒྱལ་ཁབ་ཀྱི་དེ་བས་མཛེས་སྡུག་ལྡན་པའི་ལེའུ་གསར་པ་ཞིག་རྩོམ་དགོས།

（ཤིན་ཧྭ་གསར་འགྱུར་ཁང་པེ་ཅིང་ནས་འབྱོར་བའི་གློག་འཕྲིན）

（དཔལ་སྐྱབས་རྒྱལ་གྱིས་སྒྱུར་ཞུས་བྱས）