ཤིན་ཧྭ་གསར་འགྱུར་ཁང་པེ་ཅིང་ནས་ཟླ་6ཚེས་28ཉིན་གློག་འཕྲིན་འབྱོར་གསལ། རྒྱལ་ཁབ་འཕེལ་སྒྱུར་ཨུ་ལྷན་གྱིས་ཚེས་28ཉིན་གནས་ཚུལ་སྤེལ་བར་གཞིགས་ན། རྒྱལ་ཁབ་འཕེལ་སྒྱུར་ཨུ་ལྷན་གྱིས་ཟླ་6ཚེས་27ཉིན་ཀྲུང་དབྱང་གི་སྔོན་རྩིས་ནང་ནས་མ་དངུལ་སྒོར་དུང་ཕྱུར་1.5བཀོད་སྒྲིག་བྱས་ཏེ་ཀོང་ཞི་དང་། ཨན་ཧུའེ། ཧུའུ་ནན་བཅས་ཀྱི་གནོད་འཚེ་ཕོག་ཁུལ་གྱི་གནོད་སྐྱོན་ཕོག་པའི་སློབ་གྲྭ་དང་སྨན་ཁང་། ཆུ་བེད་ཆུ་ལོག་སྔོན་འགོག་སོགས་ཀྱི་སྒྲིག་བཀོད་འཕྲལ་བསྟུན་སླར་གསོ་བྱེད་པར་རྒྱབ་སྐྱོར་བྱས་ནས་གནོད་འཚེ་ཕོག་ཁུལ་གྱི་རྒྱུན་ལྡན་གྱི་ཐོན་སྐྱེད་དང་འཚོ་བའི་སྒྲིག་ལམ་གང་མགྱོགས་སླར་གསོ་ཡོང་བར་སྐུལ་འདེད་བཏང་ཡོད་པ་རེད།

（ཕུར་སྒྲོན་གྱིས་སྒྱུར་ཞུས་བྱས）