（པར་ངོས་དང་པོར་མཐུད）ལྕགས་རི་རིང་པོའི་རིག་གནས་དར་སྤེལ་དང་ལྕགས་རི་རིང་པོའི་གཏམ་རྒྱུད་ཡག་པོ་བརྗོད་དེ། མི་དེ་བས་མང་བས་ལྕགས་རི་རིང་པོར་ཤེས་རྟོགས་དང་ལྕགས་རི་རིང་པོར་སྲུང་སྐྱོང་བྱ་རྒྱུར་སྐུལ་ཁྲིད་བྱེད་པ་དང་། མེས་པོས་བཞག་པའི་རྩ་ཆེའི་རྒྱུ་ནོར་འདི་མི་རབས་ནས་མི་རབས་བར་རྒྱུན་འཛིན་ཐུབ་པ་དང་། སྤྱི་ཚོགས་རིང་ལུགས་ཀྱི་རིག་གནས་རྒྱལ་ཁབ་སྟོབས་ཆེན་འཛུགས་སྐྲུན་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་ཆེད་སྟོབས་ཤུགས་ལེགས་སྐྱེས་སུ་འབུལ་རྒྱུའི་རེ་བ་ཡོད་ཅེས་ནན་གྱིས་བསྟན་ཡོད།
ལྕགས་རི་རིང་པོ་ནི་རང་རྒྱལ་གྱི་ད་ཡོད་གཞི་ཁྱོན་ཆེ་ཤོས་ཀྱི་རིག་གནས་ཤུལ་བཞག་ཅིག་ཡིན། 1984ལོར། ཏེང་ཞའོ་ཕིང་དང་ཞི་ཀྲུང་ཞུན་སོགས་འགོ་ཁྲིད་བློ་མཐུན་གྱིས་རྒྱལ་སའི་ལས་ཁུངས་ཁ་ཤས་ཀྱིས་སྤེལ་བའི“ངའི་ཀྲུང་ཧྭ་ལ་དགའ། རང་རྒྱལ་གྱི་ལྕགས་རི་རིང་པོ་ཉམས་གསོ་བྱེད”ཅེས་པའི་བྱེད་སྒོའི་གླེང་གཞི་བྲིས་གནང་ནས། རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་གིས་ལྕགས་རི་རིང་པོར་སྲུང་སྐྱོང་བྱེད་པའི་སྤྲོ་སེམས་འཕེལ་བར་གནང་ཡོད། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལྕགས་རི་རིང་པོའི་རིག་གནས་རིན་ཐང་སྔོག་འདོན་དང་རིག་དངོས་ཤུལ་བཞག་རྒྱུན་འཛིན་སྲུང་སྐྱོང་ལས་དོན་ལ་ཚད་མཐོའི་མཐོང་ཆེན་གནང་ནས། མཛུབ་སྟོན་གལ་ཆེན་ཐེངས་མང་གནང་བ་དང་། ལྕགས་རི་རིང་པོའི་རྒྱལ་ཁབ་རིག་གནས་སྤྱི་གླིང་འཛུགས་སྐྲུན་ལ་སྐུལ་འདེད་གཏོང་རྒྱུར་མཛུབ་ཁྲིད་གནང་ཡོད། ཉེ་ཆར། པེ་ཅིང་གྲོང་ཁྱེར་པ་ཏ་ལིང་ལྕགས་རི་རིང་པོའི་གཤམ་འོག་གི་ཧྲི་ཞ་གྲོང་ཚོའི་གྲོང་མིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་ལ་འཕྲིན་ཡིག་སྤྲིངས་ནས་ལྕགས་རི་རིང་པོའི་སྲུང་སྐྱོང་ལས་དོན་ནང་རང་འགུལ་ངང་ཞུགས་པ་དང་གྲོང་ཚོའི་འཕེལ་རྒྱས་དང་འགྱུར་ལྡོག་སོགས་ཀྱི་གནས་ཚུལ་སྙན་སེང་ཞུས་ཏེ། ལྕགས་རི་རིང་པོར་མུ་མཐུད་སྲུང་སྐྱོང་དང་ལྕགས་རི་རིང་པོའི་རིག་གནས་རྒྱུན་འཛིན་བྱ་རྒྱུའི་ཆོད་སེམས་མཚོན་པར་བྱས་ཡོད།（པ་ཚེས་སྒྱུར་ཞུས་བྱས）
藏公网安备 54010202000024号